აჭარის ავტონომიური რესპუბლიკის განათლების, კულტურისა და სპორტის სამინისტრო აცხადებს საოჯახო ანსამბლების კონკურსს.

კონკურსის მიზანია ტრადიციული ხელოვნების, ქართული ხალხური სიმღერისა და ცეკვის პოპულარიზაცია, ნიჭიერი შემსრულებლების გამოვლენა და საზოგადოებისთვის მათი შემოქმედების გაცნობა-პოპულარიზაცია და წახალისება.

კონკურსის შედეგად მოხდება იმ საოჯახო ანსამბლების წახალისება და მხარდაჭერა, რომლებიც წლების მანძილზე საკუთარი ძალებითა და ენთუზიაზმით ახერხებდნენ შეენარჩუნებინათ, აღედგინათ და გაეცოცხლებინათ ფოლკლორული ნიმუშები. 

კონკურსი წარიმართება სამ ეტაპად: 

ა) განაცხადების მიღება იწარმოებს 2022 წლის 3 ოქტომბრიდან 7 ოქტომბრის ჩათვლით. 

ბ) მეორე ეტაპი ჩატარდება 2022 წლის ოქტომბერ-ნოემბერში, აჭარის ავტონომიური რესპუბლიკის თითოეულ მუნიციპალიტეტში ინდივიდუალურად.

გ) კონკურსის მესამე, ფინალური ეტაპი და დაჯილდოების ცერემონიალი ჩატარდება 2022 წლის ნოემბერ-დეკემბერში.

საოჯახო ანსამბლების ხელშეწყობის ფარგლებში გამარჯვებულებს გადაეცემა ფულადი ჯილდო - 3 000 ლარი და ბროლის პრიზი, ხოლო მონაწილე საოჯახო ანსამბლებს გადაეცემათ დიპლომები. სულ გამოვლინდება 6 გამარჯვებული ანსამბლი 6 მუნიციპალიტეტიდან (1 მუნიციპალიტეტიდან 1 გამარჯვებული ანსამბლი).