აჭარის ჯანმრთელობისა და სოციალური დაცვის სამინისტრომ ბავშვთა სამედიცინო და სოციალური რეაბილიტაციის პროგრამების ფარგლებში, 2023 წელს გაზარდა როგორც დაფინანსების ოდენობა, ასევე მოსარგებლეთა რაოდენობა.

   პროგრამების საერთობიუჯეტი მიმდინარე წელს 4 152 200 ლარია.

   ბავშვთა სამედიცინო და სოციალური რეაბილიტაციის პროგრამები ითვალისწინებს:

   "ბავშვთა ფსიქოსომატურ აბილიტაცია/რეაბილიტაციას" - ბავშვთა ცერებრალური დამბლის, ცენტრალური და პერიფერიული ნერვული სისტემის, კუნთების სხვადასხვა დაავადებების მქონე ბავშვთა რეაბილიტაციის კურსების დაფინანსებას.

  "ძვალ-სახსროვანი სისტემის დეფორმაციის მქონე ბავშვთა რეაბილიტაციას" - ძვალ-სახსროვანის სისტემის სხვადასხვა დეფორმაციის მქონე ბავშვებისათვის რეაბილიტაციის კურსების დაფინანსებას.

  "ბავშვთა ადრეულ განვითარებას" - განვითარების დარღვევის ან ასეთი რისკის მქონე ბავშვების განვითარების სტიმულირებას და სოციალური ინტეგრაციის ხელშეწყობას.

 

  "აუტიზმის სპექტრის დარღვევების მქონე ბავშვთა რეაბილიტაციას" - აუტიზმის სპექტრის დარღვევების მქონე 2-დან 18 წლამდე ასაკის ბავშვების რეაბილიტაციის კურსების დაფინანსებას.

   "სმენაპროთეზირებულ ბავშვთა აბილიტაცია/რეაბილიტაციას" - სხვადასხვა ხარისხის სმენადაქვეითებული სმენაპროთეზირებული (კოხლეარული იმპლანტი, სმენის აპარატი) ბავშვების უზრუნველყოფას მათ საჭიროებებზე მორგებული სარეაბილიტაციო მომსახურების კურსებით.

  პროგრამების მიზანია განსაზღვრული დიაგნოზის მქონე ბავშვებისა და ოჯახების გაძლიერება, ინკლუზიური განვითარების მხარდაჭერა, სპეციფიკური რეაბილიტაცია/აბილიტაცია, ფიზიკური ჯანმრთელობის გაუმჯობესება და ადაპტაციური შესაძლებლობების გაძლიერება.

   2022 წელს სამედიცინო და სოციალური რეაბილიტაციის სხვადასხვა კურსი ჩაუტარდა 2 159 ბენეფიციარს.