ბათუმი სოფლის ტურიზმის საერთაშორისო კონფერენციას მასპინძლობს
12 მაისი, 2023
ბათუმი ევროპის სოფლის ტურიზმის გენერალურ ასამბლეასა და სოფლის ტურიზმის საერთაშორისო კონფერენციას მასპინძლობს.
კონფერენციის მონაწილეებს აჭარის სოფლის მეურნეობის მინისტრი, ზაზა შავაძე მიესალმა. მინისტრმა გამოსვლისას ყურადღება გაამახვილა აჭარაში სოფლის ტურიზმის მნიშვნელობაზე და მის როლზე სოფლის განვითარების მიმართულებით, ასევე ისაუბრა სამინისტროს მიერ გატარებულ ღონისძიებებზე რომელიც ხელს უწყობს, სოფლის ეკონომიკის დივერსიფიკაციას და სოფლად მცხოვებ მოსახლეობისთვის შემოსავლების ზრდას.
ღონისძიებაზე აჭარის სოფლის მეურნეობის სამინისტროს, პოლიტიკის დაგეგმვისა და ანალიტიკის დეპარტამენტის უფროსმა კარლო კეკელიძემ წარადგინა პრეზენტაცია თემაზე: მთიან მუნიციპალიტეტებში სოფლის ტურიზმის მხარდაჭერის პროექტები.
ღონისძიებაზე, რომელსაც 10-მდე ევროპული ქვეყნის ტურიზმის ექსპერტი ესწრებოდა სოფლის ტურიზმის მიმართულებით ევროპული ქვეყნებისა და საქართველოს გამოცდილებაზე ისაუბრეს.
სოფლის ტურიზმის მდგრადი განვითარება, შესაძლებლობები და გამოწვევები, არსებული რეალობა და გამოწვევები სოფლის ტურიზმში, არამატერიალური კულტურული მემკვიდრეობა, როგორც ტურისტული პროდუქტი, ჩემი წარმატებული ისტორიები სოფლად, სათავგადასავლო ტურიზმი და ციფრული ტექნოლოგიები- ეს ის ძირითადი თემების ჩამონათვალია, რომელზეც კონფერენციაზე იმსჯელეს.
ევროპის სოფლის ტურიზმის გენერალური ასამბლეა ბათუმში წელს პირველად ჩატარდა, სოფლის ტურიზმის საერთაშორისო კონფერენციას კი ბათუმი მეოთხედ მასპინძლობს.
იხილეთ გალერეა